Bygging Apple-„geimskipsins“ endanlega samþykkt

Tölvurisinn Apple hefur birt ljósmyndir af líkani af nýjum höfuðstöðvum fyrirtækisins sem eru í byggingu. Steve Jobs, stofnandi Apple, kynnti byggingaráformin fyrir borgarráði Cupertino-borgar í Kaliforníu nokkrum mánuðum fyrir dauða sinn árið 2011.

Í gær var kosið endanlega um bygginguna og samþykkti borgarráðið hana eftir sex klukkustunda umræður. Höfuðstöðvarnar ganga undir nafninu Apple Campus 2, en byggingin er einnig kölluð Geimskipið, þar sem lögun þess minnir á geimskip úr vísindaskáldsögu.

Verkefnið er komið langt yfir kostnaðaráætlun og er áætlaður heildarkostnaður við bygginguna talinn verða rúmir sex hundruð milljarðar þegar upp er staðið.

Hin rúmlega 250 þúsund fermetra bygging mun hýsa skrifstofur Apple, fyrirlestrarsal fyrir eitt þúsund manns, líkamsræktarstöð og bílastæðahús, svo eitthvað sé nefnt. Alls munu um tólf þúsund manns starfa í byggingunni.

Þá verður ekki eina einustu sléttu rúðu að finna í byggingunni. Þýskur glerframleiðandi hefur þróað gler sem aldrei hefur verið framleitt áður en um sex kílómetrar af bognu gleri verða notaðir í bygginguna.