Skortur á unglingastarfi hamlar þátttöku KV í 1. deildinni

Knattspyrnufélag Vesturbæjar, KV, tryggði sér sæti í 1. deild karla í fótbolta um helgina þegar liðið varð í öðru sæti í 2. deildinni en KV og HK unnu sér þá sæti í 1. deildinni. Það eru talsverðar kröfur settar á félög sem spila í 1. deild og þurfa þau öll að standast leyfiskerfi KSÍ.

KV hefur spilað heimaleiki sína á gervigrasvelli KR-inga sem er ekki löglegur völlur samkvæmt leyfiskerfinu en KV-menn þurfa samt að hafa meiri áhyggjur af því að vera ekki með unglingastarf. KV gæti fengið undanþágu til að leika áfram á gervigrasinu ef lögð verður fram framkvæmdaáætlun og það er því skortur á  unglingastarfi sem fyrst og fremst hamlar þátttöku KV í 1. deildinni.

Liðin í 1. deild karla þurfa að vera með skriflega áætlun um knattspyrnulegt uppeldi frá níu ára aldri sem KSÍ hefur samþykkt og starfrækja að minnsta kosti fjögur unglingalið hjá félaginu þar af eitt fyrir aldurinn tíu ára og yngri og tvö á aldrinum 11 til 14 ára.

„Við höfum verið að fagna um helgina og það sem við förum í núna er að skoða þessi mál. Það þarf enginn að hafa áhyggjur. Við erum rosalega metnaðarfullir og störfum faglega. Það eru fleiri mánuðir í að þetta hefjist og við munum leysa þetta með KSÍ. Við höfum engar áhyggjur," segir Björn Berg Gunnarsson, framkvæmdastjóra KV, í viðtali á vefsíðunni fótbolti.net en hann segir þar íslenska knattspyrnu vera að breytast.

„Umræðan í borginni er öll um það að sameina eigi íþróttafélög. Ef það á að gera kröfur um að þriðji aðilinn komi inn með yngri flokka í samkeppni við KR og Gróttu er það algjörlega galið. Ég hef ekki nokkra trú á öðru en að þetta verði bara leyst í sameiningu með KSÍ," sagði Björn Berg en það má sjá alla umfjöllun fótbolta.net um málið með því að smella hér.