Mayweather: Hann myndi ekki vinna mig einu sinni í 42 bardögum

Floyd Mayweather og Saul Canelo Alvarez berjast í Las Vegas á laugardagskvöldið og vilja margir meina að nú loksins sé kominn maður fram sem getur lagt Mayweather af velli.

Saul Canelo Alvarez hefur átt farsælan feril og unnið 42 bardaga og aðeins gert jafntefli í einum. Mayweather er 36 ára og hefur unnið 44 atvinnubardaga á sínum ferli og aldrei tapað.

„Hann [Saul Canelo Alvarez] hefur barist 42 sinnum og aldrei tapað, það er rétt en hann hefur aftur á móti ekki mætt mér 42 sinnum,“ sagði Mayweather á blaðamannafundi í Bandaríkjunum.

„Hann myndi aldrei vinna mig ef við myndum mætast 42 sinnum. Ég er lítið að hugsa um það hverja hann hefur barist við heldur bara einbeiti ég mér að sjálfum mér.“

„Það sem boxari getur gert vel, get ég gert óaðfinnanlega. Ég fæddist til að vera í hringnum og ég er andlit íþróttarinnar.“