Nýtt veggspjald fyrir Málmhaus

Það styttist óðum í frumsýningu kvikmyndarinnar Málmhaus eftir leikstjórann Ragnar Bragason. Hún verður frumsýnd á alþjóðlegu kvikmyndahátíðinni í Toronto sem hefst þann 5. september og þann 11. október hér á landi.

Nýtt veggspjald myndarinnar var birt í dag en Málmhaus segir frá ungri stúlku búsettri í sveit sem leitar í þungarokk til að takast á við fjölskylduharmleik.

„Hana dreymir um að vera þungarokksstjarna og spilar tónlist foreldrum sínum og sveitungum til meiri ama en skemmtunar,“ sagði Ragnar í samtali við Vísi fyrir stuttu, en glæsilegt veggspjaldið má stækka með því að smella á það hér til hliðar.