Stofnendur Snapchat voru "certified bros"

Jóhannes Stefánsson skrifar 10. júlí 2013 21:08

Samskipti drengjanna súrnuðu svo um munaði, enda kom upp ágreiningur hver ætti hugmyndina og þar með tilkall til jafnvirði hundrað milljarða síðar meir.

Dómsskjöl sem hafa verið gerð opinber vegna málaferla stofnenda Snapchat á hendur hvor öðrum leiða í ljós hvernig grín og gauragangur varð að dómsmáli vegna 800 milljón dollara fyrirtækis. Upphæðin jafngildir rúmum hundrað milljörðum íslenskra króna.

Um er að ræða útprentanir af SMS-skilaboðum og tölvupóstum sem fóru drengjanna á milli. Þau leiða í ljós að hugmyndin að smáforritinu kviknaði ekki sem eiginleg viðskiptahugmynd heldur vildu þeir reyna að fá gellur (e. chicks) til að senda sér myndir af sér.

Drengirnir voru ekki óánægðir með myndir sem stúlkur kepptust við að senda þeim

Síðan sést hvernig samskipti drengjanna taka að breytast þegar raunveruleikinn fer að renna upp fyrir þeim; þeir höfðu eignast gullgæs sem var hundruð milljóna dollara virði. Þeir átta sig að endingu á því að það skiptir máli hver er skráður hugmyndasmiður forritsins, en þeir eru ekki allir á einu máli hver það er. Að svo búnu upphófust málaferli sem standa nú yfir, en skjölin eru framlögð dómskjöl í málinu.

Hér sést þegar þeir eru hættir gríninu og alvaran er tekin við.

Þessi dómskjöl eru mjög áhugaverð, en þau sýna ferlið frá stofnun forritsins til dagsins í dag. Þegar þeir eru að reyna að koma smáforritinu á kortið segjast þeir meðal annars vera „certified bros", eða staðfestir vinir. Þeir leggja til að hægt sé að nota forritið til að deila með vinum sínum einkabröndurum og svo geti stelpur spurt hvora aðra „hvort rassinn á mér virðist feitur í þessum kjól, og svo framvegis.

Skjölin í málinu má sjá á vefsíðu Gawker.