Flestir lykilmenn Aftureldingar ætla að spila með liðinu í 1. deildinni

Handboltalið Aftureldingar ætlar að takast að halda flestum sínum lykilmönnum þrátt fyrir að lið þeirra hafi fallið úr N1 deild karla í handbolta í vetur. Mosfellingar sendu frá sér fréttatilkynningu í kvöld þar sem félagið greinir frá þessu.

Afturelding féll úr N-1 deildinni nú í vor en þrátt fyrir það er mikill hugur í Mosfellingum og þeir ætla sér beint upp aftur eftir næsta tímabil.

Afturelding er með mikinn efnivið innan sinna raða, flestir leikmenn eru uppaldir Mosfellingar, og því er framtíðin björt í Mosfellsbænum. Þjálfari Aftureldingar er Konráð Hilmar Olavsson sem mun stýra liðinu næstu tvö tímabil að minnsta kosti.

Meðal þeirra leikmanna sem voru að framlengja sína samninga eru, Örn Ingi Bjarkason, Davíð Svansson markvörðurinn sterki, unglingalandsliðsmennirnir Pétur Júníusson, Böðvar Páll Ágeirsson, Birkir Benidiktsson, auk þess sem framlenging á samningi skytturnar sterku Jóhanns Jóhannssonar er  á lokastigi.   

Ísfugl og Afturelding voru einnig að skrifa undir nýjan tveggja ára samstarfssamning þar sem Ísfugl verður áfram aðalstyrktaraðili handbolatliðsins.