Kenndi ökunemendum að gera “kleinuhringi” og var handtekinn

Taldi slíka kennslu auka á hæfni nemenda að bjarga sér úr háska.

Ökukennari nokkur í South Charleston í Virginíu taldi það bráðnauðsynlegan lærdóm hjá nemendum sínum að gera "kleinuhringi" en lögreglan var ekki sammála honum og handtók hann fyrir vikið. Kennarinn vill meina að ef nemendur sínir kunni að stjórna bíl sem skrikar til þá séu þeir hæfari og líklegri til að bjarga sér úr háskalegum aðstæðum síðar meir. Því lét hann nemendur sína skrika viljandi kennslubílnum og finna hreyfingar hans og ná fullri stjórn á honum þrátt fyrir hliðarskriðið.

Skiptar skoðanir eru um það hvort athæfi ökukennarans réttlæti handtöku og vilja margir meina að ekkert sé sakhæft við kennslu hans, heldur þvert á móti sé hún einmitt góður undirbúningur fyrir óreynda ökumenn og til þess fallin að auka á hæfni þeirra og öryggi. Aðrir telja slíka kennslu hvetja unga ökumenn til kærulauss aksturslags. Ekki hefur enn fallið dómur í máli ökukennarans.