Land Rover íhugar minni jeppling

Myndi keppa við bíla eins og BMW X1, Mini Countryman og Porsche Macan.

Land Rover bílar eru dýrir bílar en fyrirtækið íhugar að auka verulega sölu sína með enn minni bíl en Range Rover Evoque og Land Rover Freelander. Slíkur bíll myndi keppa við bíla eins og BMW X1, Mini Countryman og Porsche Macan sem enn er ekki kominn í sölu.

Þessi flokkur bíla er mjög vaxandi og spár benda til að svo muni verða um hríð. Verðið á þessháttar bíl yrði um 18.000 pund eða um 27.500 dollarar, þ.e. kringum þrjár og hálfa milljón króna. Bíllinn gæti orðið líkur hugmyndabílnum Land Rover DC100 sem hér sést.

Ekkert hefur verið ákveðið enn og stjórnendur Land Rover sitja nú yfir þessari viðskiptahugmynd og ef hún lítur vel út munu þeir láta slag standa. Sannarlega er Land Rover DC100 sætur jepplingur, kubbslegur eins og títt er um Land Rover bíla en fallega teiknaður. Tíminn einn verður að leiða í ljós hvort af honum verður.