Einar með tilboð frá Molde í Noregi

Einar Jónsson, þjálfari Fram í N1-deild karla, er nú með tilboð í höndunum frá kvennaliði Molde í Noregi. Einar þjálfaði sem kunnugt er kvennalið Fram þar til nýverið.

Þetta kemur fram í Morgunblaðinu í dag en Einar hélt til Noregs um helgina þar sem hann skoðaði aðstæður.

Molde er sem stendur í C-deildinni í Noregi en forráðamenn liðsins hafi í huga að koma liðinu upp í efstu deild á nokkrum árum og skipa sér sess sem eitt besta lið landsins.

Ef Einar tekur tilboði Molde er líklegt að hann haldi utan í sumar, eftir að núverandi tímabili í N1-deild karla lýkur. Framarar hafa undir hans stjórn þegar náð að tryggja sér sæti í úrslitakeppni deildarinnar í vor.