Audi fjölgar sýningarsölum með sýndarveruleika

Þar virða kaupendur fyrir sér útlit draumabílsins á risaskjá og breyta honum að vild.

Hvað gera bílaframleiðendur sem ekki hafa pláss fyrir breiða vörulínu sína í dýru húsnæði stærstu borganna? Þeir setja upp sýningarsali með sýndarveruleika á fáum fermetrum.

Þar geta áhugasamir kaupendur skoðað draumabíl sinn og valið allar hugsanlegar útfærslur bíla sinna. Þeir geta fengið að sjá nákvæmt útlit þeirra á risavöxnum skjám og breytt þeim eftir geðþótta. Audi hefur áætlanir um uppsetningu 20 slíkra sala viðsvegar um heiminn og hefur tekið tvo þeirra í notkun nú þegar, þann fyrsta í London og fyrir stuttu opnaði annar í Peking.

Í fyrra tók BMW slíkan sal í notkun í París og þar á bæ verður brátt tilkynnt um opnum fleirri slíkra. Mercedes Benz hefur opnað einn svona sal í Mílanó. Þessi aðferð sparar fyrirtækjunum mikið fé og er líklega framtíðin í kynningu og sölu þeirra á bílum. Engu að síður kostaði salur BMW í París 11 milljónir Evra, en í honum getur fólk virt fyrir sér bíla BMW í þrívídd á samtals 94 fermetra flötum.

Forsvarsmenn Audi segja að sala bíla þeirra í þeirra fyrstu tveimur sölum hafi farið framúr þeirra björtustu vonum og því er eðlilegt að til standi að fjölga þeim ört á næstunni. BMW segir að starfsfólkið í þessum sölum séu ungt og mjög tæknilega hæft, með mikla tölvuþekkingu. Starfsfólkið stjórnar sýndarveruleikabúnaðinum með iPad tölvur í hönd.

Cadillac og Lexus ætla að fara sömu brautir og eru komin í startholurnar með opnum samskonar sýningarsala. Næstu borgirnar sem Audi ætla að opna slíka sali í eru Berlín, Shanghai, París, Róm, Moskva og New York.