Patrekur framlengir við Austurríkismenn

Austurríska handknattleikssambandið greinir frá því á heimasíðu sinni í dag að það sé búið að framlengja samning sinn við Patrek Jóhannesson til ársins 2015. Patrekur þjálfar karlalandslið Austurríkis.

Vísir greindi frá því í byrjun nóvember á síðasta ári að Austurríkismenn vildu framlengja við Patrek og tíðindin koma því lítt á óvart.

Patrekur hefur verið þjálfari hjá Austurríki síðan um sumarið 2011 en þá tók hann við liðinu af Svíanum Magnus Andersson.

Patrekur hefur verið að byggja upp nýtt lið hjá Austurríki og hefur sú uppbygging gengið vel. Austurríkismenn eru klárlega sáttir því þeir sleppa Patta ekki næstu árin.

Hann mun taka við þjálfun karlaliðs Hauka næsta sumar og sinnir landsliðsþjálfarastarfinu samhliða vinnu sinni hjá Haukum.