Umfjöllun: ÍR - Valur 25-24 | Ótrúlegt sigurmark

ÍR vann sætan sigur á Val, 25-24, á heimavelli sínum í N1-deild karla í dag. Björgvin Hólmgeirsson tryggði ÍR-ingum sigurinn með ótrúlegu skoti fáeinum sekúndum fyrir leikslok.

ÍR fer með sigrinum í 13 stig og bætir stöðu sína um sæti í úrslitakeppninni en Valsmenn sitja áfram á botninum með 7 stig.

Liðin mættu til leiks í dag eftir ansi langt hlé vegna heimsmeistarmótsins á Spáni og það tók leikmenn nokkrar mínútur að ná af sér ryðinu.

Valsmenn voru með töluvert breyttan leikmannahóp frá því fyrir HM-hlé en Nikola Dukic, Orri Freyr Gíslason og Fannar Þorbjörnsson voru allir að spila með Hlíðarendaliðinu í dag. Hjalti Pálmason er svo væntanlegur með hlýnandi veðri. ÍR var með óbreyttan leikmannahóp að mestu en þó ber að minnast á að hinn síungi markvörður, Sebastian Alexandersson, er kominn til liðsins.

Heimamenn byrjuðu leikinn mun betur og voru komnir með 3-0 forystu eftir fimm mínútna leik. Nikola Dokic skoraði fyrsta mark Valsmanna og sitt fyrsta í deildinni og eftir það var leikurinn í miklu jafnvægi.

Valsmenn komust yfir í fyrsta skipti á 24.mínútu þegar Finnur Ingi Stefánsson skoraði og breytti stöðunni í 10-11. ÍR-ingar gerðu næstu tvö mörk en það fór svo að liðin gengu til búningsherbergja jöfn, 13-13.

Nikola Dokic, nýr leikmaður Vals, spilaði prýðilega í fyrri hálfleik og ljóst að koma hans styrkir Hlíðarendapilta til muna. ÍR-ingar voru að fá fín framlög frá hornapari sínu, þeim Sigurjóni og Sturlu, en Sturla sýndi enn og aftur fádæma öryggi á vítalínunni.

Síðari hálfleikur var ekki ósvipaður þeim fyrri og liðin börðust hatramlega um hvern einasta bolta. Valsmenn virtust vera á ágætis róli þegar um 20 mínútur voru eftir og spilamennska liðsins benti til þess að leikurinn myndi enda á ánægjulegum nótum fyrir Hlíðarendastórveldið.

Valur komst í 22-24 þegar aðeins þrjár mínútur voru eftir af leiknum en þá snerist leikurinn algjörlega í höndunum á gestunum. ÍR-ingar komu grimmir til baka, vel studdir af góðum áhorfendum sínum. Valsmenn virkuðu mjög taugaóstyrkir og klúðruðu boltanum ítrekað í sókninni. Valsmenn fengu dæmdan á sig ruðning þegar um 20 sekúndur voru eftir af leiknum og þá var komið að þætti Björgvins Hólmgeirssonar.

Þessi snjalli leikmaður hefur aldrei verið feiminn við að skjóta á markið og það var þessi áræðni Björgvins sem skilaði ÍR ótrúlegu sigurmarki. Björgvin var aðþrengdur af tveimur varnarmönnum en lét vaða á markið. Boltinn sigldi beina leið upp í samskeytin fjær, óverjandi fyrir Lárus Helga í marki Vals, ótrúlegt skot.

Bjarki: Var búinn að sætta mig við jafntefli

Bjarki Sigurðsson brosti í leikslok í viðtali við Rúv. „Það er auðvitað mjög gott að vinna leikinn, ekki síst vegna þess að mér fannst halla á okkur í dómgæslunni allan leikinn.“

Bjarki sá jákvæða punkta úr leiknum. „Ég held reyndar að línumennirnir okkar hafi fengið á sig fleiri ruðninga í þessum leik en í öllum okkar leikjum í vetur en svona er þetta bara. Ingimundur (Ingimundarson) var fjarri góðu gamni í dag (Ingimundur var uppi á fæðingardeild með konu sinni) en það kemur bara maður í manns stað og mér fannst vörnin þokkleg í leiknum.“

Sigurmark Björgvins var óvænt en ánægjulegt fyrir Bjarka „Það er bara fáránlegt að skjóta í þessu færi og skora. Ég var búinn að sætta mig við jafntefli.“