Eitt besta og verðmætasta listasafn í heimi bakvið lás og slá

Í rammgerðri hvelfingu í borginni Genf í Sviss er að finna eitt besta og verðmætasta listasafn í heimi en verkin í því munu aldrei koma fyrir augu almennings.

Um er að ræða öryggishvelfingu í ómerktri byggingu en þar geyma efnaðir einstaklingar listaverk sem þeir hafa keypt sem fjárfestingar. Talið er að listaverkin í hvelfingunni séu tuga ef ekki hundraða milljarða króna virði.

Í umfjöllun í Jyllands Posten um málið segir að m.a. sé talið að um 300 listaverk eftir Picasso séu í hvelfingunni. Fjöldi þeirra tilheyrir Nahmad fjölskyldunni sem eru Gyðingar frá Líbanon búsettir í Mónakó. Haft hefur verið eftir einum af meðlimum fjölskyldunnar að kaup á Monet eða Picasso sé eins og að kaupa hluti í Microsoft eða Coca Cola.

Í kjölfar kreppunnar hefur áhugi á að kaupa listaverk sem fjárfestingar aukist gífurlega. Áætlað er að slík kaup hafi numið tæplega 50 milljörðum evra eða vel yfir 8.000 milljörðum króna á síðasta ári.

Öryggishvelfingar á borð við þessa er einnig að finna í Luxemborg og Singapore en hvelfingin í Genf er sú langstærsta af þeim. Hún er 10.000 fermetrar að stærð eða á við hálfa Kringluna.