Zero Dark Thirty best

Zero Dark Thirty í leikstjórn Kathryn Bigelow er besta kvikmynd ársins 2012 samkvæmt vefsíðunni Metacritic.com.

Þar eru teknir saman topp tíu listar virtustu gagnrýnenda Bandaríkjanna og Bretlands yfir bestu myndir ársins, þar á meðal frá The Guardian, The New York Times, Time, Entertainment Weekly og Rolling Stone.

Zero Dark Thirty fjallar um leitina að Osama bin Laden og var nýlega tilnefnd til fernra Golden Globe-verðlauna. Myndin er með 95 í einkunn af 100 mögulegum hjá Metacritic. Síðasta mynd Bigelow, The Hurt Locker, hlaut sex Óskarsverðlaun og búast margir við því að Zero Dark Thirty feti í fótspor hennar á næstu Óskarsverðlaunahátíð í Hollywood.

Í öðru sæti á listanum er franska myndin Amour sem vann Gullpálmann í Cannes fyrr á árinu. Hún fjallar um fyrrum tónlistarkennara og hjón sem eru á níræðisaldri.

Númer þrjú á listanum er Lincoln í leikstjórn Stevens Spielberg, sem fjallar um Bandaríkjaforsetann Abraham Lincoln. Hún var tilnefnd til sjö Golden Globe-verðlauna á dögunum, þar á meðal aðalleikarinn Daniel Day-Lewis.

Moonrise Kingdom, nýjasta mynd Wes Anderson, er í fjórða sæti, og í því fimmta er The Master í leikstjórn Pauls Thomas Anderson (Magnolia, Boogie Nights). Hún er með Joaquin Phoenix og Philip Seymour Hoffman í aðalhlutverkunum og fjallar um náunga sem snýr aftur heim eftir að hafa verið í sjóhernum.