Fyrir börn og barnalega

Bíó. Hugo. Leikstjórn: Martin Scorsese. Leikarar: Asa Butterfield, Ben Kingsley, Chloë Grace Moretz, Sacha Baron Cohen, Ray Winstone, Jude Law, Christopher Lee, Helen McCrory, Michael Stuhlbarg, Emily Mortimer.



Munaðarleysinginn Hugo Cabret býr á stórri lestarstöð í París á fjórða áratug síðustu aldar. Eftir að fyllibyttan frændi hans hverfur sporlaust tekur drengurinn ungi að sér hlutverk hans og viðheldur klukkum lestarstöðvarinnar og sér til þess að þær séu réttar. Hann þarf þó stöðugt að vera á varðbergi gagnvart leiðinlegum öryggisverði sem sendir flækingsbörn miskunnarlaust á munaðarleysingjahæli, hafi hann hendur í hári þeirra. En líf Hugo litla tekur breytingum þegar hann kynnist viðskotaillum eiganda leikfangaverslunar og ungri guðdóttur hans.

Martin Scorsese hefur hingað til eingöngu sinnt fullorðnum kvikmyndahúsagestum og því er spennandi að sjá hann spreyta sig á hreinræktaðri ævintýramynd fyrir alla aldurshópa. Sennilega var líka komið að því að hann þyrfti að söðla um og prófa eitthvað nýtt, en hans seinasta verk, sálfræðitryllirinn Shutter Island, var óvandað og misheppnað.

Í þetta sinn vandar hann til verka og útkoman er litrík og fjörug fjölskyldumynd sem flestir ættu að geta skemmt sér yfir. Asa Butterfield er þrælfínn í titilhlutverkinu og hvergi er veikan hlekk að finna í leikaraliðinu, þó að sumum kunni að finnast það furðulegt að allar þessar frönsku persónur tali ensku að hætti yfirstéttarfólks. Einnig langar mig að minnast sérstaklega á Sasha Baron Cohen, en hann fer á kostum í hlutverki leiðinlega öryggisvarðarins, og kitlar hláturtaugarnar ítrekað.

Þá fær áhugafólk um kvikmyndasögu heilmikið fyrir sinn snúð, en Hugo er hlaðin vísunum í upphafsár kvikmyndanna. Myndatakan er sérlega glæsileg en þó eru nokkur skot í myndinni sem minna meira á tölvuleik en kvikmynd. Ef til vill geðjast einhverjum að slíku, en á mig virkaði það truflandi og algjör óþarfi. Þrátt fyrir það býr myndin yfir nægilegum töfrum til að úr verði gott ævintýri.

Niðurstaða: Heillandi mynd fyrir börn og barnalegt fólk á öllum aldri. Ég skal glaður setja sjálfan mig í síðari flokkinn.