Tveir stórlaxar í Holunni

Opnun Blöndu á morgun lítur vel út enda segja Lax-ármenn á heimasíðu sinni frá því að Höskuldur Erlingsson, lögreglu- og leiðsögumaður, hafi slegið á þráðinn um helgina þar sem hann var staddur við veiðistaðinn Holuna á svæði 1 í Blöndu. Þar horfði hann á tvo stóra laxa sem hann áætlaði á bilinu 14 – 16 pund, en eins og flestir vita þá opnar Blanda í fyrramálið og hefst þá laxveiðitímabilið formlega.

Það er ekki oft sem laxar sjást vel fyrir opnun í Blöndu, menn þurfa að vita nákvæmlega hvar á að leita því áin er oft talsvert lituð í byrjun júní. En Höskuldur og Þorsteinn Hafþórsson hafa báðir séð laxa í Holunni og Damminum, og þar sem þeir eru ekki neinir nýgræðingar í Blöndufræðum má búast við skemmtilegri opnun á morgun.

Opnunardaginn í fyrrasumar komu átta laxar á land, þar af sex á fyrstu vaktinni. Þá var skítakuldi og bálhvasst við Blöndu og erfitt að bera sig að við veiðar. Eftir hitabylgju undanfarið verða aðstæður aðrar þó spár segi að blíðuveðrið sé á enda í bili.

Einhverjir dagar eru lausir í næstu viku í Blöndu en þar eftir er svæði 1 uppbókað fram í ágústbyrjun – það fer því hver að verða síðastur að tryggja sér veiði á þessu gjöfula svæði þetta sumarið.