Eitthvað fyrir alla hjá Veiðiskóla SVAK

Veiðiskóli Stangveiðifélags Akureyrar (SVAK) hefst nú um helgina, en þetta er fjórða árið sem hann er starfræktur. Í fyrra var metþátttaka og komu á annað hundrað manns á námskeið á vegum veiðiskólans en þátttakendum hefur fjölgað jafnt og þétt öll fjögur árin sem skólinn hefur verið haldinn.

Í sumar verða fimm námskeið í boði, sem verða endurtekin nokkrum sinnum yfir sumarið eftir þörfum. Þegar er búið að teikna upp 25 námskeið, en skólinn hefur á sínum snærum sjö kennara sem allir eru þaulreyndir veiðimenn.

Námskeiðin sem þegar hafa verið skipulögð eru námskeið fyrir unglinga, veiði- og kastnámskeið fyrir byrjendur á einhendu auk námskeiðs þar sem kennt er að veiða með tvíhendu. Þá er boðið uppá námskeiðið „Lærðu á ána" þar sem boðið er uppá veiði í ám í Eyjafirði með vönum veiðimönnum.

Allar frekari upplýsingar um veiðiskóla SVAK finnur þú hér: svak.is.