Þjálfari meistaraliðs Juventus yfirheyrður af lögreglu

Ítalska lögreglan hefur handtekið fyrirliða fótboltaliðsins Lazio, Stefano Mauri og Omar Milanetto fyrrum leikmann Genoa vegna gruns um að þeir hafi tekið þátt í að hagræða úrslitum í leikjum í ítalska fótboltanum. Þjálfari Ítalíumeistaraliðs Juventus, Antonio Conte, var yfirheyrður af lögreglunni í tengslum við þetta mál samkvæmt frétt Reuters.

Í tilkynningu lögreglur segir að fimm manns hafi verið handteknir í Ungverjalandi. Málið sem er í rannsókn tengist einnig Tan Seet Eng frá Singapúr sem handtekin var í desember s.l. vegna gruns um viðamikið veðmálabrask tengt úrslitum í fótbolta víðsvegar um heim.

Lögreglan í Cremona á Ítalíu hefur handtekið 19 manns í tengslum við þessa rannsókn og yfirheyrt fjölmarga aðila. Conte, þjálfari Juventus, er einn af þeim sem var yfirheyrður en hann fagnaði nýverið sigri í ítölsku deildinni. Juventus var dæmt niður um deild árið 2006 eftir að upp komst um forsvarsmenn félagsins – sem höfðu greitt dómurum háar fjárhæðir til þess að hafa áhrif á úrslit leikja.

Húsleit var gerð hjá fjölda leikmanna, starfsmanna og þjálfara hjá liðum í tveimur efstu deildunum á Ítalíu. Málið tengist öðru máli sem er til rannsóknar hjá ítölsku lögreglunni. Þar eru úrslit úr leikum Lazio og Genoa á tímabilinu 2010-2011 til rannsóknar, sem og úr leik Lecce og Lazio sama ár.