Þjálfari Milan: Zlatan er á pari við Messi og Ronaldo

Massimiliano Allegri, þjálfari AC Milan, heldur vart vatni yfir leikmanni sínum, Zlatan Ibrahimovic, sem hann segir að sé ekkert síðri en Lionel Messi og Cristiano Ronaldo.

"Ég vona að Zlatan verði valinn besti knattspyrnumaður heims. Það veltur samt mikið á því hvað við vinnum á þessu tímabili," sagði Allegri.

"Zlatan, Messi og Ronaldo eru þrír bestu leikmenn heims um þessar mundir."

Milan mætir Arsenal í Meistaradeildinni á morgun og má mikið út af bera ef liðið kemst ekki í átta liða úrslit í ljósi þess að það vann fyrri leikinn, 4-0, á Ítalíu.