Zlatan myndi fagna komu Tevez

Svíinn Zlatan Ibrahimovic myndi fagna komu Carlos Tevez til AC Milan en sá síðarnefndi hefur mikið verið orðaður við ítalska stórveldið síðustu vikur og mánuði.

Tevez hefur sem kunnugt er ekkert spilað með City síðastliðna mánuði eða síðan hann neitaði að koma inn á sem varamaður í leik með liðinu í Meistaradeild Evrópu.

AC Milan og City hafa átt í viðræðum um félagaskiptin undanfarnar vikur. AC Milan vill gera lánssamning en hjá forráðamönnum City kemur aðeins til greina að selja kappann. Þó eru báðir aðilar vongóðir um að hægt verði að komast að samkomulagi á næstu vikum.

„Mér finns Tevez vera frábær leikmaður," sagði Zlatan sem hefur verið mjög svo öflugur í liði AC Milan á tímabilinu. „Ég veit ekki í hvernig farvegi hans mál eru en það væri frábært að fá hann."

„Það vita allir hversu öflugur leikmaður hann er og hvað hann gæti fært okkar liði."