Fjárfesting dróst saman

Hagvöxtur í ríkjunum sextán sem mynda evrusvæðið varð minni á þriðja fjórðungi síðasta árs en spáð hafði verið.  Það dró úr fjárfestingu og neysla almennings jókst minna en spár gerðu ráð fyrir.

Eurostat, Hagstofa Evrópusambandsins, hafði gert ráð fyrir 0,4 prósenta hagvexti á þriðja fjórðungi ársins 2010 en þegar upp var staðið reyndist hann 0,3 prósent. Það er mun minna en sá 1 prósents vöxtur sem mældist á öðrum fjórðungi. Til samanburðar varð hagvöxtur í Bandaríkjunum 0,6 prósent og í Japan 1,1 prósent á þriðja ársfjórðungi.

Í öllum ríkjunum sextán dró úr hagvexti milli fjórðunga en Grikkland var þó eina landið þar sem samdráttur mældist. Hagkerfi landsins dróst saman um 1,3 prósent, sem var meiri samdráttur en spáð hafði verið. Þegar litið er til allra 27 landa Evrópusambandsins mældist hagvöxtur 0,5 prósent, sem er í samræmi við spár en hálfu minna en sá 1 prósents hagvöxtur sem mældist þar á öðrum fjórðungi ársins. Fyrir helgi voru einnig birtar tölur um atvinnuleysi sem sýna að 10,1 prósent vinnuafls í löndum ESB var án atvinnu í nóvembermánuði og hefur atvinnuleysi ekki mælst meira í þeim mánuði frá því um mitt ár 1998. - pg