Óvænt úrslit í úrslitakeppni NFL-deildarinnar

Úrslitakeppni NFL-deildarinnar hófst um helgina en þá voru spilaðir hinir svokölluðu "Wild Card" leikir. Er óhætt að segja að úrslitakeppnin hafi byrjað með miklum látum og úrslit afar óvænt.

Meistarar síðasta árs, New Orleans Saints, eru mjög óvænt fallnir úr leik eftir tap gegn Seattle sem vann aðeins 7 leiki í vetur og tapaði 9.

Meiðslahrjáð lið Indianapolis Colts með Peyton Manning í broddi fylkingar er einnig úr leik eftir tap gegn Jets. Colts komst yfir í leiknum er 53 sekúndur voru eftir en Jets kom til baka og tryggði sér sigur með vallarmarki er leiktíminn rann út.

Colts og Saints spiluðu úrslitakeikinn í fyrra.

Michael Vick og félagar í Philadelphia luku einnig keppni um helgina er liðið tapaði á heimavelli gegn Green Bay.

Úrslit helgarinnar:

Indianapolis-NY Jets  16-17

Kansas-Baltimore  7-30

Philadelphia-Green Bay  15-21

Seattle-New Orleans  41-36