Ofbeldisvarnaráði verði komið á fót

Forvarnir gegn kynferðislegu ofbeldi eru í engu samræmi við það hversu mikil ógn ofbeldið er við heilsu og réttindi barna á Íslandi. Þetta segir Stefán Ingi Stefánsson, framkvæmdastjóri UNICEF á Íslandi. Stofnunin hefur gert ráðamönnum grein fyrir hugmyndum sínum um að stofnað verði ofbeldisvarnaráð hér á landi sem myndi sinna forvörnum gegn ofbeldi með áherslu á kynferðislegt ofbeldi, eða að forvörnum verði fundinn staður hjá viðeigandi stofnun.

UNICEF gaf út skýrslu um stöðu barna á Íslandi í vor þar sem fram kemur að enginn á vegum hins opinbera beri ábyrgð á forvörnum gegn kynferðislegu ofbeldi gegn börnum. Þá sé vandinn ekki markvisst kortlagður með reglubundnum rannsóknum og greiningu.

„Opinberir aðilar verða að vinna markvisst gegn kynferðislegu ofbeldi. Skýrt verður að vera hverjir bera ábyrgð á forvörnum og fjármagn verður að vera tryggt til þess starfs,“ segir meðal annars í skýrslunni. Í fyrra komu 430 tilkynningar um kynferðislegt ofbeldi til barnaverndarnefnda, eða meira en ein tilkynning á dag.

„Ríkið hefur á undanförnum áratugum tekið málefni fyrir sem eru metin sem samfélagsleg ógn og barist gegn þeim með kjafti og klóm,“ segir Stefán.

„Á hverju ári fara 120 milljónir í það sem kallað er áróður hjá Umferðarstofu. Enda eru auglýsingarnar mjög flottar og hafa áhrif. Í vímuvörnum hefur það sama verið gert.“ Þessar aðgerðir hafa skilað miklum árangri, að sögn Stefáns.

Enginn beri þó ábyrgð á því að koma í veg fyrir eða minnka kynferðislegt ofbeldi gegn börnum og nánast engum opinberum peningum sé eytt í það, þrátt fyrir að kynferðislegt ofbeldi sé einhver sú mesta ógn sem steðji að börnum á Íslandi.

Heilsugæslan hefur þróað forvarnaverkefni í þessum málaflokki sem sett var af stað í byrjun árs, og segir Stefán að þar hafi verið unnið mjög gott frumkvöðlastarf. Einnig vinni félagasamtök eins og Stígamót, Blátt áfram og Drekaslóð í þessum málaflokki. Sérfræðingarnir séu því til staðar. Þá sé unnið í þessum málaflokki hjá Barnahúsi, Barnaverndarstofu og barnaverndarnefndum, „það vantar bara viljann og kraftinn frá hinu opinbera.“

thorunn@frettabladid.is