Camacho rekinn frá Osasuna

Fyrrum landsliðsþjálfari Spánar og stjóri Real Madrid, Jose Antonio Camacho, var í dag rekinn frá spænska úrvalsdeildarfélaginu Osasuna.

Osasuna tapaði í gær fyrir Real Sociedad, 1-0, og datt þar með niður í átjánda sæti deildarinnar.

Osasuna hefur tapað sex af síðustu ellefu leikjum sínum og vann aðeins einn af þeim. Það var reyndar ótrúlegur 1-0 sigur á Real Madrid.

Liðið hefur ekki heldur unnið á útivelli, hvorki í deild né bikar, í rúmt ár.

Camacho tók við liðinu í október árið 2008 og varð liðið í tólfta sæti deildarinnar undir hans stjórn á síðasta tímabili.