JD Sports Fashion vill yfirtaka rekstur JJB Sports

Íþróttavöruverslunarkeðjan JD Sports Fashion hefur lýst yfir vilja sínum til að yfirtaka rekstur JJB Sports í Bretlandi. Þetta kemur fram í frétt á Reuters.

Slitastjórn Kaupþings heldur utanum tæplega 30% hlut í JJB Sports en sá hlutur var áður í eigu Chris Ronnie fyrrum forstjóra JJB Sports og Exista. Upphaflegu kaupin á þeim hlut eru m.a. til rannsóknar hjá Serious Fraud Office, efnahagsbrotadeild bresku lögreglunnar.

Í frétt Reuters segir að JD Sports eigi nú í viðræðum við stjórn JJB Sports um yfirtökuna en að þær viðræður séu á frumstigi.

Markaðsverðmæti JJB Sports er um 29 milljónir punda, eða 5,4 milljarða kr., m.v. gengi bréfa þess í morgun. Samkvæmt því gæti hlutur Kaupþings verið um 1,6 milljarða kr. virði.