Mancini dæmdur í fangelsi í Mílanó

Mancini, fyrrum leikmaður brasilíska landsliðsins, hefur verið dæmdur í tveggja ára og átta mánaða fangelsi af dómara í Mílanó fyrir að nauðga brasilískri stúlku í partý á vegum Ronaldinho sem fram fór í desember í fyrra.

Mancini er 31 árs gamall vængmaður sem hefur verið að spila með brasilíska liðinu Atletico Mineiro að undanförnu en þegar partýið fór fram þá var hann á láni hjá AC Milan frá nágrönnum þeirra í Internazionale.

Mancini lék lengst með Roma (2003-2008) en hann varð tvisvar sinnum bikarmeistari með félaginu. Mancini lék sex A-landsleiki fyrir Brasilíu á árinu 2004 til 2008.

Mancini þykir mjög fjölhæfur leikmaður enda búinn að spila bæði sem bakvörður og framherji á sínum ferli.