Elísabet heldur áfram með Kristianstad næsta sumar

Elísabet Gunnarsdóttir hefur skrifað undir nýjan samning við Kristianstad og verður áfram þjálfari sænska liðsins. Elísabet er að klára sitt þriðja tímabil með Kristianstad en liðið er nú í 6. sæti deildarinnar með 31 stig í 19 leikjum. Þetta kemur fram í staðarblaðinu í Kristianstad.

Elísabet fór til Kristianstad fyrir tímabilið 2009 en hún gerði Valskonur fjórum sinnum að Íslandsmeisturum á árunum 2004 til 2008.

Kristianstad endaði í 10. sæti á fyrsta tímabilinu hennar með liðið 2009 og endaði í 9. sæti í fyrra eftir að hafa gefið nokkuð eftir á lokasprettinum.

Elísabet er með fjóra íslenska leikmenn hjá sér í Kristianstad en þar spila Margrét Lára Viðarsdóttir, Erla Steina Arnardóttir, Sif Atladóttir og Guðný Björk Óðinsdóttir. Þær eru vanalega allar í stórum hlutverkum í liðinu og Margrét Lára hefur skorað 12 mörk í 18 leikjum á þessu tímabili.