Bolt: Sýndi heiminum að ég er enn bestur

Fótfráasti maður jarðarinnar, Jamaíkumaðurinn Usain Bolt, vann öruggan sigur í 200 metra hlaupi á HM í frjálsum íþróttum í dag. Bolt kom í mark á 19,40 sekúndum sem er þriðja besti tími Bolt í greininni.

Bandaríkjamaðurinn Walter Dix varð annar á 19,70 sekúndum og Frakkinn Christophe Lemaitre varð þriðji á 19.80 sekúndum.

Sigurinn er kærkominn fyrir Bolt eftir martröðina í 100 metra hlaupinu þar sem hann þjófstartaði og var dæmdur úr leik.

"Ég gerði mistök en sýndi svo heiminum í dag að ég er enn bestur. Ég er ekki orðinn goðsögn en ég er á réttri leið," sagði Bolt sem ætlar sér stóra hluti á næstu Ólympíuleikum.