Ronaldo: Þurfum ekki Adebayor hjá Real

Cristiano Ronaldo, leikmaður Real Madrid, telur að það þurfi ekki að styrkja leikmannahóp liðsins með öðrum framherja.

Emmanuel Adebayor, leikmaður Manchester City, var í láni hjá Real á síðari hluta síðasta keppnistímabils en Ronaldo telur ekki þörf til að fá hann aftur til spænsku höfuðborgarinnar.

„Við erum ánægðir með leikmannahópinn eins og hann er í dag. Ég tel að við þurfum ekki að fá annan framherja,“ sagði Ronaldo við blaðamenn í Kína þar sem Real Madrid er nú í æfingaferð.

Adebayor er ekki í framtíðarplönum Roberto Mancini, stjóra City, og sat hann eftir heima þegar að City fór til Bandaríkjanna í æfingaferð. Á meðan æfði hann með unglingaliði City.