Özil fer í tíuna hjá Real Madrid

Þjóðverjinn Mesut Özil átti flott fyrsta tímabil með Real Madrid og Jose Mourinho, þjálfari liðsins, hefur verðlaunað hann með því að setja leikmanninn í treyju númer tíu á næstu leiktíð.

Það ku gefa til kynna að spilið á að fara meira í gegnum Özil á næstu leiktíð og Mourinho tippar á að Þjóðverjinn muni blómstra enn frekar í tíunni en hann var í treyju númer 23 í fyrra. Sama númer og David Beckham bar á sínum tíma.

Það verður engu að síður mikil barátta um sæti hjá Real á næstu leiktíð þar sem félagið keypti Nuri Sahin og svo er Kaká orðinn heill heilsu.

Özil var með næstflestar stoðsendingar í spænska boltanum á síðustu leiktíð. Hann gaf 17 stoðsendingar en Messi var með 19.