50 laxar á land í síðasta holli í Hítará á Mýrum

Loksins er Hítará á Mýrum líkt og hún á að sér að vera. Miklar göngur hafa verið síðustu daga og veiðin frábær. 50 laxar veiddust í síðasta holli.

Það fór eins og marga grunaði. Hítaráin er einfaldlega sein í gang eins og svo margar laxveiðiárnar á Vesturlandi þetta sumarið. Mjög sterkar göngur hafa verið undanfarna daga - og það á minnsta straum. Holl sem lauk veiðum í gærdag hafði 50 laxa á land og að sögn þeirra sem stóðu vaktina er mikill lax genginn. Ekki tók verra við hjá þeim sem hófu veiðar í gærdag því sautján laxar veiddust á síðdegisvaktinni.

Reyndar hefur Hítará alla tíð verið upp á sitt besta í lok júlímánaðar, fyrir utan síðustu ár þar sem veiðin hefur færst óvenjulega framarlega. Nú er ástandið sem sagt eðlilegt og besti tíminn að ganga í garð.

Þeir sem eiga veiðisvæðið Hítará II á næstunni geta farið að hlakka til, því umtalsverðar göngur hafa horfið upp á efri svæðin.

Birt með góðfúslegu leyfi SVFR