Nadal og Djokovic mætast í úrslitum Wimbledon

Spánverjinn Rafael Nadal sigraði Skotann Andy Murray í undanúrslitum Wimbledon-mótsins í tennis í dag. Nadal sem á titil að verja mætir Serbanum Novak Djokovic í úrslitaleik á sunnudag.

Andy Murray byrjaði betur í viðureign kappanna í dag og sigrði í fyrsta settinu 7-5. Nadal kom hins vegar sterkur tilbaka og sigraði í þremur næstu settum 6-2, 6-2 og 6-4. Leikur kappanna tók tæpar þrjár klukkustundir.

Úrslitaleikurinn á sunnudag verður í beinni útsendingu á NRK1 á fjölvarpinu og hefst útsending klukkan 13.