Adebayor: Mourinho hefur lofað að kaupa mig

Framherjinn Emmanuel Adebayor er bjartsýnn á að komast til Real Madrid og er til í að bíða í allt sumar ef þess þarf. Adebayor segir að Jose Mourinho, þjálfari Real, hafi lofað kaupa sig í sumar og sjálfur vill hann hvergi annars staðar vera.

"Ég er til í að bíða þar til félagaskiptaglugginn lokar 31. ágúst ef þess þarf. Mourinho hefur lofað mér því að gera allt sem hann getur til þess að kaupa mig. Ég er bjartsýnn á að það geti gengið upp. Real er mér allt. Ég elska félagið," sagði Adebayor sem var í láni hjá félaginu eftir áramót og stóð sig vel.

"Á síðasta degi mínum hjá félaginu þá kröfðust félagar mínir þess að ég yrði keyptur. Það var ótrúlegt. Ég trúi ekki að Man. City reyni að standa í vegi fyrir mér. Ég held að Mancini hafi engan áhuga á að halda mér."