Veitingahúsið þar sem Serena Williams skar sig enn ónafngreint

Allra augu eru á tenniskonunni Serenu Williams á Wimbledon-mótinu í tennis sem er nýhafið. Williams hefur verið frá í tæpt ár en hún skar sig illa á báðum fótum á veitingahúsi í München.

Williams á að hafa stigið á glerbrot á gólfi veitingahússins. Skurðir á bátum fótum voru svo slæmir að sauma þurfti fjölmörg spor. Síðar á árinu fékk Williams blóðtappa í bæði lungu og eru skurðirnir taldir orsök þess.

Blaðamaður Guardian bendir á þá staðreynd að nú tæpu ári síðar hefur enn ekki verið greint frá nafni veitingahússins. Þýska blaðinu Bild, sem er ekki þekkt fyrir að fara mjúkum höndum um stjörnurnar og með höfuðstöðvar í München, hefur ekki einu sinni tekist að finna út úr því.

Williams var með 6,5 milljónir dollara í tekjur á árinu 2009 og því var tekjumissir hennar á árinu 2010 töluverður sökum meiðslanna. Því þykir blaðamanninum afar athyglisvert að veitingahúsið óþekkta hafi ekki verið lögsótt.

Þá bendir blaðamaður einnig á þá staðreynd að Williams hafi spilað leik gegn Kim Clijsters daginn eftir slysið í München. Einnig hafi sést til Williams á háum hælum og aðeins með plástur fimm dögum eftir slysið.

„Það er leiðinlegt að ég hafi þurft að fara í uppskurð en ég er ekki að ljúga eða í sjálfsneitun. Þetta er eins og þetta er," sagði Williams við fjölmiðilinn USA Today í febrúar síðastliðnum.