Viðræðum um kaupin á All Saints slitið

Viðræðum um kaupin á bresku tískukeðjunni All Saints hefur verið slitið. Skilanefndir Kaupþings og Glitnis hafa átt í þessum viðræðum við fjárfestingarfélagið M1 Group og Rchard Sharp fyrrum starfsmann Goldman Sachs.

Í frétt um málið í Financial Times segir að M1 Group sé frá Líbanon og að það njóti stuðnings frá komandi forsætisráðherra landsins.  Fram kemur í fréttinni að skilanefndirnar séu með annan kaupenda í sigtinu.

Verðmiðinn á All Saints hljóðar upp á 140 milljónir punda. Skilanefndir Kaupþing og Glitnis hefðu getað fengið um 9 milljarða kr. út úr þessari sölu á All Saints ef hún hefði farið í gegn.

Í frétt hjá The Press Association fyrr í vetur segir að eigendur All Saints hafa fengið Ernst & Young til að vera ráðgjafar við söluna. All Saints er í meirhlutaeigu Kevin Stanford en Kaupþing og Glitnir halda á um 35% eignarhlut sem áður var í eigu Baugs.

Talsmaður M1 Group staðfestir í samtali við Financial Times að þeir hafi slitið viðræðunum. Í yfirlýsingu frá All Saints segir að viðræður haldi áfram við annan kaupenda sem sýnt hafi keðjunni áhuga. Vonast sé til að niðurstaða náist í þeim viðræðum í „náinni framtíð“ eins og það er orðað.

Samkvæmt heimildum Financial Times er hinn áhugasami kaupandi bandaríski hlutabréfasjóðurinn Goode Partners.

All Saints rekur nú yfir 100 verslanir í Bretlandi, Evrópu, Bandaríkjunum og Rússlandi.