Telur núll krónur lenda á ríkinu ef dómsmál verða hagstæð

Icesave-samninganefndin telur varlega áætlað að 32 milljarðar króna gætu lent á ríkissjóði vegna nýrra samninga samkvæmt nýju mati, en áður var þessi fjárhæð talin 47 milljarðar. Þá telur nefndin að ekkert lendi á ríkinu ef tvö mál sem nú eru rekin fyrir dómstólum verði ríkissjóði í hag.

Á kynningarfundi í fjármálaráðuneytinu í dag fór samninganefndin yfir breyttar forsendur um endurheimtur í þrotabú Landsbankans, en samtímis fundinum var slitastjórn Landsbankans að funda með kröfuhöfum í Lundúnum.

Samsetning eigna þrotabúsins hefur nú breyst þannig að hærra hlutfall þeirra er nú í reiðufé og verðtryggðu skuldabréfi sem Landsbankinn gaf út, samtals um 677 milljarðar króna en þessi upphæð var 615 milljarðar í uppgjöri sem kynnt var í fyrra.

Ágreiningur um heildsöluinnlán gæti skipt sköpum

Miðað við breyttar forsendur áætlar samninganefndin nú að 32 milljarðar króna lendi á ríkissjóði. „Þegar við reiknuðum þetta út, að 32 milljarðar gætu lent á ríkissjóði á næstu fimm árum, þá tókum við ekki með í reikninginn jákvæð áhrif af tveimur lagalegum atriðum," segir Jóhannes Karl Sveinsson, hæstaréttarlögmaður sem situr í samninganefndinni.

Annars vegar mun Tryggingarsjóður innistæðueigenda reyna á forgang sinn til greiðslna úr þrotabúinu umfram aðra innistæðutryggingarsjóði, en þessi túlkun hefur verið kennd við Ragnar Hall. Og hins vegar er rekið mál vegna svokallaðra heildsöluinnlána fyrir Héraðsdómi Reykjavíkur, en fjárhæð þeirra krafna nemur 147 milljörðum króna. Slitastjórn Landsbankans féllst á forgang þeirra, en almennir kröfuhafar reyndu að hnekkja þeirri afstöðu fyrir dómstólum.

„Ef það verður niðurstaðan að heildsöluinnlánin séu ekki forgangskröfur þá lækkar kröfumassinn, þessar 1.320 milljarðar í bú Landsbankans, sem því nemur og þ.a.l hækkar upphæðin til þeirra sem eru eftir og við vitum að ríkið er með meira en helminginn af þeim ávinningi þannig að þá geta menn reiknað það út sjálfir að ekki verður mikill kostnaður eftir sem lendir á ríkissjóði," segir Jóhannes Karl.

Höftin verða að vera áfram nema tryggt sé að afnám þeirra þýði ekki gengishrap

Eins og áður hefur komið fram lýtur helsta áhætta vegna nýrra samninga að genginu. Fram kom hjá samninganefndinni í dag að færa mætti rök fyrir því að viðhalda þyrfti gjaldeyrishöftunum svo forsendur kostnaðar vegna nýrra samninga héldu, en aðeins að því gefnu að afnám haftanna þýddi lækkun gengis, sem skiptar skoðanir eru um.

En má fullyrða að ekki lendi króna á ríkissjóði vegna Icesave-samninganna hinna nýju ef fyrrgreindu dómsmálin tvö feli í sér jákvæða niðurstöðu? „Ef að forsendur um gengisbreytingar halda, þ.e ef gengið verður svipað og það er núna, þá má fullyrða það, já," segir Lárus Blöndal, sem situr í samninganefndinni. thorbjorn@stod2.is