Hægt að leigja kvikmynd með Facebook krónum

Afþreyingarrisinn Warner Bros. Entertainment hefur nú opnað fyrir þann möguleika á Facebook síðu sinni að hægt sé að leigja kvikmynd í gegnum síðuna með því að nota Facebook krónur (Facebook-credits).

Greint er frá málinu á cnet.com en þar kemur fram að Warner Bros. hafi komið sér upp sérstöku forriti á Facebook síðunni sem gerir þetta mögulegt. Fyrsta myndin sem hægt er að leigja með þessum hætti er Batman-myndin The Dark Knight.

Frá og með deginum í dag verður hægt að leigja þessa mynd fyrir 30 svokallaðar Facebook krónur. Einnig er hægt að nota hefðbundna gjaldmiðla til að leigja myndina.

Warner Bros. sér Facebook sem möguleika á því að bregðast við minnkandi sölu á kvikmyndum sínum.