FT: Hagnaður Iceland Foods 35 milljarðar í fyrra

Samkvæmt frétt á vefsíðu Financial Times er reiknað með að verslunarkeðjan Iceland Foods hafi hagnast um 190 milljónir punda eða rúmlega 35 milljarða kr. í fyrra. Sem kunnugt er af fréttum heldur skilanefnd Landsbankans á 66% hlut í Iceland og Glitnir á 10%.

Tilkynnt verður um afkomu Iceland í mars n.k. en þá lýkur reikningsári keðjunnar. Hagnaðurinn í fyrra er nokkur meiri en árið áður þegar hann nam 180 milljónum punda. Financial Times segir að þessar afkomutölur sýni sterka stöðu Iceland á krepputímum.

Hinsvegar kemur fram á vefsíðunni að stjórn Iceland áformi að greiða eigendum sínum 100 milljónir punda eða 18,7 milljarða kr. í arð í ár. Fyrstu fregnir af þessari arðgreiðslu, sem greint frá hér á visir.is voru að arðgreiðsla þessi næmi 330 milljónum punda.

Fjallað er um fyrirhugaða sölu á Iceland en Financial Times segir að ef keðjan fari á uppboð sé líklegt að aðrar breskar stórmarkaðakeðjur hefðu áhuga á að kaupa Iceland. Þetta helgast af því að um yrði að ræða síðustu stóru dagvöruverslanakeðjuna sem færi í sölu á Bretlandseyjum. Sem stendur rekur Iceland 750 verslanir á Bretlandseyjum. Þar af var 71 ný verslun opnuð í fyrra á vegum Iceland.