USF1 liðið sleppir fyrstu mótunum

Nýliðarnir frá Bandaríkjunum USF1 er að reyna semja við FIA um að fá að sleppa fyrstu fjórum mótunum á mótaskrá Formúlu 1 í ár. Liðið er ekki komið nógu langt með keppnisbíl sinn og ýmis byrjunarörðugleikar hafa háð liðinu.

"Við erum að vinna í þessum málum með FIA, til að sjá hvað við megum sleppa mörgum mótum. Hentugast væri fyrir okkur að geta sleppt fyrstu fjórum mótunum og mæta til Barcelona", sagði Ken Anderson í viðtali við New York Times.

Það getur vel verið að liðið fái sektir fyrir að missa af byrjuninni, en í samningi milli keppnisliða stendur að lið megi missa af þremur mótum. FIA mun hinsvegar sýna USF1 skilning í málinu, þó einnig hafi verið rætt að lið verði að mæta í öll mót.

"FIA fer varla að gefa okkur rásleyfi og svo skella hurðinni, þó við missum af byrjuninni. Það eru bara misfellur á veginum sem við erum að fást við. FIA vill hjálpa okkur", sagði Anderson.