Zlatan verður áfram hjá Barcelona

Umboðsmaður Zlatan Ibrahimovic á ekki von á öðru en að leikmaðurinn verður áfram í herbúðum Barcelona á næsta tímabili.

Zlatan kom til Barcelona frá Inter síðastliðið sumar en mörgum fannst hann ekki standa undir þeim væntingum sem gerðar voru til hans í vetur.

Eftir að David Villa samdi við Barcelona fyrr í mánuðinum hafa sögusagnir verið á kreiki um að Zlatan sé á leið aftur til Ítalíu, en nú til AC Milan.

„Ibra er ekki að flytja frá Barcelona og ég skil ekki af hverju hann ætti að gera það. Hann vill ekki fara frá Barcelona og félagið vill ekki selja hann," sagði umboðsmaðurinn við spænska miðla.

„Hann náði ekki að enda tímabilið eins vel og hann hafði vonast til en það gekk allt vel hjá honum þar til í febrúar. Það eru hreinar ýkjur að halda því fram að hann ætti að fara annað."