Frederiksen: Íslendingar fá lánið frá Dönum

Danir ætla að halda áfram greiðslum af láni sínu til Íslands þrátt fyrir óvissuna í Icesave málinu. Hinsvegar mun sú afstaða breytast ef Icesave frumvarpið verður fellt í þjóðaratkvæðagreiðslu.

Þetta hefur Ritzau fréttastofan eftir Claus Hjort Frederiksen fjármálaráðherra Danmerkur eftir fund hans með Steingrími J. Sigfússyni fjármálaráðherra Íslands.

„Fjármálaráðherra Íslands hefur tryggt að þeir muni standa við alþjóðlegar skuldbindingar sínar," segir Fredriksen. „Við erum ánægðir með þá afstöðu og þegar þeir standa við sínar skuldbindingar munum við standa við samkomulag okkar við Ísland."

Danir hafa þegar borgað 600 milljónir danskra kr. af 3,5 milljarða danskra kr. láni sínu til Íslands.

„Það er augljóst að ef niðurstaða atkvæðagreiðslunnar verður nei hafa skilyrðin breytst. En það verðum við að taka afstöðu til á þeim tíma," segir Frederiksen.

Fram kemur í máli Frederiksen að Íslendingar hafi ekki beðið Dani um frekari aðstoð.