Hólmfríður vonast eftir nýjum samningi í Bandaríkjunum

Samningur Hólmfríðar Magnúsdóttur við bandaríska atvinnumannafélagið Philadelphia Independence rennur út eftir nokkrar vikur. Hún hefur fullan hug á því að vera áfram hjá liðinu.

„Ég fékk dauðafæri í landsleiknum eftir hálfa mínútu en skaut í jörðina. Ég hefði örugglega skorað ef ég hefði ekki verið að spila vinstri bakvörð úti og lítið æft mig í að klára færin. Ég er samt ekkert að afsaka mig," sagði Hólmfríður og glotti.

„Ég veit ekki hvort að ég fái samninginn endurnýjaðan. Þeir þurfa að semja við mig aftur til að halda mér og ég vona að þeir vilji það. Það er erfitt að vera erlendur leikmaður úti þar sem aðeins fimm slíkir mega vera hjá félaginu."

"Það er því ekkert auðvelt að komast að, þarna eru svo margir sterkur leikmenn. Ég er samt sem áður búin að byrja alla leiki nema einn og hef verið að spila vel, þetta hefur verið upp á við, sér í lagi í síðustu sex leikjum," sagði Hólmfríður og bætti við að málið ætti að skýrast fljótlega.