Efnahagsbatinn í Noregi ekki eins góður og talið var

Komið er á daginn að efnahagsbatinn í Noregi var ekki jafn góður og leit út fyrir í upphafi þannig að Norðmenn hafa stigið á bremsuna í vaxtahækkunum.

Fjallað er um málið í Morgunkorni greiningar Íslandsbanka. Þar segir að norski seðlabankinn ákvað í gær að halda vöxtum sínum óbreyttum í 1,75%. Norski seðlabankinn hefur tvisvar hækkað vexti sína frá síðastliðnu hausti um samanlagt 0,5 prósentur og varð hann fyrsti seðlabankinn í Evrópu til að byrja að auka peningalegt aðhald að nýju síðan fjármálakreppan braust út.

Í upphafi vaxtahækkunarferilsins síðastliðið haust gerði seðlabankastjórinn Jan F. Qvigstad ráð fyrir að hækka vextina jafnt og þétt en þar sem verðbólguþrýstingur og þensla hefur verið minni undanfarna mánuði í Noregi en upphaflega var reiknað með hefur ferlið gengið hægar fyrir sig.

Noregur gekk í gegnum mun mildari efnahagslægð en önnur Evrópuríki og um mitt síðasta ár benti allt til þess að norska hagkerfið hefði náð að hrista af sér slappleikann. Nú hefur hinsvegar komið á daginn að batinn var ekki jafn góður og leit út fyrir í upphafi sem gerir það að verkum að hægar verður farið í sakirnar með að hækka vextina.