Kína í stríði við Evrópu og Japan um sjaldgæfa málma

Evrópubandalagið og Japan íhuga nú að kæra Kínverja til WTO vegna útflutningstakmarkana Kínverja á sjaldgæfum málmum. Þegar er farið að bera á skorti á þessum málmum á mörkuðum í Evrópu.

Í frétt um málið á börsen.dk segir að iðnaðarlöndin telji að takmarkanir Kínverja séu ólöglegar. Skorturinn á þessum málmum ógni atvinnulífi Vesturlanda og Japan. Í Þýskalandi hafa iðnaðarrisar á borð við Siemens, Bosch og BASF tilkynnt að takmarkaður aðgangur að þessum málmum muni skaða rekstur þeirra.

Kínverjar hafa varið takmarkanir sínar með því að segja að þeir verði að verja eigin birgðir af þessum málmum. Werner Schnappauf formaður Samtaka iðnaðarins í Þýskalandi blæs á þau rök. Hann segir að Kínvrjar séu að reyna að auka verðmæti þessa útflutnings síns. Afleiðingarnar verði að fleiri af þessum málmum verði fimm- til sjöfalt dýrari um næstu áramót en þeir eru nú.

Tímaritið Economist gerði úttekt á þessu máli nýlega en málmar þessir tilheyra 17 sjaldgæfustu efnunum í frumefnatöflunni. Um er að ræða efni eins og neodymium sem m.a. gerir farsímum kleyft að titra þegar þeir hringja, dysprosium sem gerir segulstáli kleyft að viðhalda eiginleikum sínum við háan hita og cerium oxide sem m.a. er notað í slípiefni fyrir gler.

Sem stendur eru í Kína um 35% af öllum óunnum birgðum heimsins af þessum málmum og Kína stendur fyrir 95% markaðshlutdeild þeirra á alþjóðamörkuðum, þar af fara 60% á innanlandsmarkaðinn í Kína.