Þúsundir milljarða á dauðum reikningum í Danmörku

Danskar lífeyriskrónur gufa upp á reikningum sem hvorki er borgað inn á eða út af. Reiknað er með að um 500 milljarðar danskra kr. eða um 10.000 milljarðar kr. liggi inni á þessum „dauðu" lífeyrissjóðsreikningum eins og það er orðað í dönskum fjölmiðlum í morgun.

Hver Dani sem kominn er á fertugsaldurinn á að meðaltali tvo lífeyrissjóðsreikninga. Yfirleitt hefur hann eignast annan reikninginn við að skipta um vinnu og þar með byrjað að borga í annan lífeyrissjóð en hann var með áður.

Í frétt um málið í Jyllands Posten segir að þessir dauðu reikningar kosti viðkomandi töluverðar fjárhæðir á hverju ári því viðkomandi lífeyrissjóðir taka gjöld af þeim þótt engin hreyfing sé á reikningunum árum eða áratugum saman. Þessi gjöld geta numið allt að 1.500 dönskum kr., eða um 30.000 kr. á hverju ári. Þar til viðbótar kemur rekstrarkostnaður upp á 0,4-0,65% hjá mörgum sjóðanna af þeirri upphæð sem stendur inni á reikningnum.

Þessir dauðu reikningar eru því mjög góð viðskipti fyrir lífeyrissjóðina að mati Jörgen Svendsen sem er sérfræðingur í rekstri lífeyrissjóða.

Samkvæmt upplýsingum frá Lars Ellehave-Andersen forstjóra PFA Pension eru um 65 milljarðar danskra kr. nú liggjandi inn á um 360.000 svona reikningum hjá sjóðnum, reikningum sem hvorki er borgað inn á né borgað út af.