Rússneskir olíumilljarðar streyma í danskt sprotafyrirtæki

Rússneskir olíumilljarðar streyma nú inn í lítið sprotafyrirtæki í bænum Vojens á Suður-Jótlandi í Danmörku.

Um er að ræða tæknifyrirtækið Johnson Oil sem stofnað var sem sprotafyrirtæki fyrir nokkrum árum. Nú hefur það gert sölusamninga við rússnesk olíufyrirtæki upp á yfir milljarð danskra króna eða yfir 20 milljarða króna. Fremst í flokki rússnesku fyrirtækjana er olíurisinn Gazprom eitt stærsta olíufyrirtæki heimsins.

Johnson Oil hefur sérhæft sig í framleiðslu á filterum, eða síum, fyrir olíuiðnaðinn. Fyrirtækið framleiðir meðal annars síu sem getur skilið að olíu og vatn á ódýran hátt.

Í frétt um málið í Jyllands-Posten segir að Johnson Oil hafi nýlega gengið frá samningi við Gazprom til tíu ára sem gæti gefið Dönunum allt að 15 milljarða króna í aðra hönd. Fram kemur í fréttinni að annar viðskiptavina Johnson Oil er RAO Rosnefte sem sérhæfir sig í byggingu olíuhreinsunarstöðva.

Henrik Karlsgaard forstjóri Johnson Oil segir að þeir hafi nú fengið sérfræðinga sér til liðs til að skrá fyrirtækið á markað í kauphöllinni í Kaupmannahöfn. Enda hafi rússnesku viðskiptavinirnir þegar keypt minniháttar hluti í Johnson Oil.