Schumacher tekur út refsingu í Belgíu

Michael Schumacher þarf að ræsa 10 sætum aftar en tími hans í tímatökum á Spa brautinni í Belgíu um næstu helgi segir til um. Hann braut á Rubens Barricehllo í síðustu keppni, ók í veg fyrir hann og fékk dæmt á sig víti.

"Spa hefur alltaf verið mín uppáhaldsbraut og af þeim sökum hlakka ég til mótshelgarinar. Það er langt síðan ég hef mætt á staðinn, en það mun há mér að hafa fengið akstursvíti", sagði Schumacher í tilkynningu frá Mercedes liðinu á f1.com.

"Það verður því ekki við miklu að búast, en hver kílómetri á brautinni er erfiður og hægt að læra ýmislegt um bílinn í mótinu. Ég mun gera mitt besta um helgina."

Nico Rosberg er liðsfélagi Schumachers of hefur unnið sér inn fleiri stig á árinu.

"Það er gott að hafa fengið sumarfrí og verður gott að keppa á ný. Spa er ein erfiðasta brautin sem við ökum á og háhraða braut, með frábærum beygjum eins og Eau Rogue. Þetta er frábær staður til að aka Formúlu 1 bíl. Síðasta keppni okkar var erfið, en við vonumst til að gera betur á Spa", sagði Rosberg.