Raikkönen ósáttur við Renault umræðu

Finninn Kimi Raikkönen segist ekki ætla að ganga til liðs við Formúlu 1 lið Renault, en hann hefur verið orðaður við liðið síðustu vikur.

Raikkönen hafði að sögn autosport.com samband við Renault eftir belgíska kappaksturinn og Eric Boullier framkvæmdarstjóri talaði frjálslega um málið að mati Raikkönen. Raikkönen hefur keppt í heimsmeistarakeppninni í rallakstri á Citroen á þessu ári.

Raikkönen segir í frétt á autosport.com að hann hafi ekki áhuga á því sem Renault hefur upp á að bjóða og er vitnað í viðtal við Raikkönen í finnska dagblaðinu Turun Sanomat.

"Ég er mjög svekktur hvernig þeir hafa notað nafn mitt í þeirra markaðssetningu. Ég hef aldrei íhugað það alvarlega að keyra með Renaut og ég get fullvissað ykkur um það að ég er 100% viss að ég keyri ekki með Renault á næsta ári", sagði Raikkönen.

Bouiller hafði sagt það í vikunni á f1.com að það væri sómi að Raikkönen hefði haft samband við liðið og sýndi að liðið hefði gert góða hluti á árinu og geti keppt um titilinn í framtíðinni.