Meisturunum tveimur vel til vina

Lewis Hamilton og Jenson eru báðir meistarar og Button núverandi handhafi titilsins. Hamilton sem vann titilinn 2008 var spurður hvort mikil samkeppni ríkti á milli þeirra á blaðamannafundi í dag, en Button er ofar Hamilton í stigamótinu hjá McLaren liðinu Hamilton hefur verið lengur hjá liðinu og því spáðu margir í hvort umskiptin hefði verið sterkur leikur eða veikur í vetur. Kapparnir tveir keyra á fyrstu æfingum á Sjanghæ brautinni í Kína í nótt. Oft verður einskonar stríð á milli liðsfélaga, en andinn á milli Buttons og Hamiltons er afar jákvæður. "Samstarf okkar gengur vel. Við löndum mörgum stigum fyrir liðið og hann er að gera frábæra hluti. Okkur lyndir vel saman. Button færir liðinu bara jákvæðni og er í góðu jafnvægi og vel gerður persónuleiki", sagði Hamilton um liðsfélaga sinn og keppinaut í brautinni. Þeir takast á við Sjanghæ brautina um helgina með McLaren og fóru báðir í ökuhermi McLaren til að bæta bíla sína fyrir mótið og finna út úr vanköntum á uppsetningu þeirra. Hamilton telur eins og fleiri að Red Bull bílarnir hafi forskot eins og staðan er núna hvað hraða bíla varðar, en gæðin hefur vantað í bíl Sebastian Vettel sem hefur bilað í tvígang. Annars væri hann trúlega með 3 sigra í handraðanum. "Sebastian gæti verið nokkuð á undan, en eins og staðan er núna er mjótt á munum. Ég vona að það verði raunin á næstunni, en spurning hvort Red Bull bílarnir þola eldraunina eður ei. Við verðum að gæta þess að sýna stöðugleika. Maður hefur ekki efni á því að falla úr leik of oft í stigamótinu."