Grænlendingar undir þrýstingi um að hætta við olíuleit

Heimastjórnin á Grænlandi er nú undir vaxandi þrýstingi um að endurskoða áætlanir sínar um olíuleit undan ströndum landsins.

Ef áætlanir grænlensku heimastjórnarinnar ganga eftir mun fyrstu leyfunum til olíuleitar verða úthlutað á næstu tveimur vikum. Þeir sem gagnrýna þessar áætlanir benda á mengunarslysið í Mexíkóflóa og að það ætti að koma í veg fyrir að leyfin verði veitt.

Fjallað er um málið í Berlingske Tidende í dag. Þar er haft eftir haffræðingnum og Cambridge prófessornum Peter Wadhams að það sé hreint brjálæði að veita fleiri leyfi til olíuleitar og vinnslu á hafsbotni í ljósi reynslunnar frá Mexíkóflóa.

Wadhams aðvarar grænlensku heimastjórnina og segir að svipaður leki við strendur Grænlands og gerðist á Mexíkóflóa muni hafa ófyrirsjáanlegar afleiðingar þar sem aðeins er hægt að stunda olíuboranir við strendur landsins yfir sumartímann. Því sé möguleiki til staðar að olíuleki á þessu hafsvæði standi yfir í eitt ár án þess að hægt verði að grípa til nokkurra ráðstafana gegn honum.

Nátturuverndarsjóðurinn World Wildlife Fund hefur einnig sent öflug mótmæli til heimastjórarinnar. Jörn Skov Nielsen talsmaður heimastjórnarinnar vísar þessum áhyggjum á bug. Grænlendingar séu með mun öflugri reglugerð en Bandaríkjamenn í olíuleitarmálum.